المنطق_الرياضي والروابط المنطقية

كان في المقرر القديم في أولى ثانوي عندنا اكتر من نوع واحد من الروابط المنطقية ودايرين نفهمها كلها وندي مثال ليها من عالم البرمجة سواء فرونت / باك / تطبيقات / سوفتوير.

1️⃣ الرابط "AND" (وَ) &&

بالعربي كدا "و" اذا عندك تسجيل دخول مثلا داير تدخل علي الفيسبوك التحقق بتم عبر شرطين اذا اختل واحد فيهم انت بتترفض صح؟ اسم المستخدم (رقم التلفون او البريد) و كلمة السر.

2️⃣ الرابط "OR" (أو) ||

بالعربي كدا "او" يعني يكفي انو واحد من الشروط يتحقق او الاتنين كمثال في الحياة الواقعية لو استدعت المدرسة ولي أمرك جبت ابوك ممتاز جبت امك ممتاز جبتهم الاتنين برضو ممتاز 🙂. ممتاز للمدرسة اما انت اتشهود وح تسمع الجملة الاسطورية "ليكم اللحم ولينا العظم" 😂.

3️⃣ الرابط "NOT" (ليس / العكس) !

بالعربي كدا "ليس" او "عكس" دا شفت زي صاحبكم البحب يعاكسكم تقولو خماسيات يقول بوش تقولو بوش يقول خماسي بغض النظر عن الظروف. كمثال عندك الدخول للاعدادات في المواقع اول ما تضغط علي الزر هو بتحقق من الوظيفة او الصلاحية بتاعتك "لو م المدير ما بتخش":

if (!admin) {
    return 'access denied';
} 

4️⃣ الرابط "XOR" (أو الحصرية) ^

بالعربي م عارفو والله 😂. المهم دا إذا وحدة فقط صحيحة بكون الناتج صحيح يعني اذا الاتنين صحيحات بكون خطأ 🙂. المثال نرجع لي صفحة تسجيل الدخول قلنا الاتنين يكونو صحيحات صح ؟ لانو بالرابط "و" طيب في اسم المستخدم عندنا رابط "او" لكن ما منطقي لانو لو دخلت بريدك الإلكتروني ورقم الهاتف سوا 🙂🙂 بالرابط "او" المفروض تخش بس دا ما بحصل لانو نحن مستخدمين "XOR" لانو عارفين في ناس بتفكر بي كرعيها 😂.

5️⃣ الرابط "IF... THEN" (إذا كان... فإن) →

اذا كان فإن دا ساهل جدا بكون منطقيا وركز علي منطقيا دي صحيح اذا كان الشرط الأول صحيح والناتج صحيح لانو هنا العلاقة ما بين شرطين العلاقة بين شرط وناتج فلو الشرط اتحقق والناتج ما اتحقق دي المشكلة. اما اذا الشرط ما اتحقق منطقيا وركز علي منطقيا لو الناتج اتحقق او لأ ما فارق. 💡 وين بنحتاج المفاهيم دي؟ عموما دي تحتاجها في:

• التحقق من البيانات Data Validation.
• التحكم في مسار البرنامج Control Flow.
• وغيرو..

#يوميات_مبرمج #برمجة #programming #software_engineering